Kapiteni i Francës, Kylian Mbappé, ka mbetur pa shënuar në tri ndeshjet e fundit me kombëtaren, por trajneri Didier Deschamps nuk duket aspak i shqetësuar para fillimit të Kupës së Botës.

Franca mposhti 3-1 Irlandën e Veriut në ndeshjen e fundit miqësore para nisjes drejt Botërorit, por vëmendja u përqendrua te paraqitjet e kundërta të dy yjeve ofensivë të “Gjelave”, shkruan Arbresh.info.

Ndërsa Mbappe nuk arriti të gjente rrugën e rrjetës për të tretën ndeshje radhazi, pavarësisht disa rasteve të krijuara, shkëlqeu Michael Olise, i cili realizoi një tregolësh fantastik dhe udhëhoqi Francën drejt fitores.

Pas ndeshjes, Deschamps minimizoi çdo shqetësim për mungesën e golave të sulmuesit të Real Madrid.

“Nuk do të shqetësohem. Është e vërtetë që ka pasur disa raste, por nuk ka qenë mjaftueshëm klinik. Ai më tha se po i ruan golat për SHBA-në, kështu që jam në rregull me këtë”, deklaroi trajneri francez me humor.

Nga ana tjetër, Olise vazhdoi formën e shkëlqyer që ka treguar edhe me FC Bayern Munich. 24-vjeçari realizoi dy gola nga afërsia dhe e kompletoi hat-trickun me një goditje të bukur nga distanca.

Deschamps nuk i kurseu elozhet për anësorin ofensiv.

“Ai po shkëlqen, ashtu si gjatë gjithë sezonit te Bayerni. Gjithçka i vjen natyrshëm. Është efikas dhe kjo është shumë e rëndësishme. Por do të kemi nevojë edhe për lojtarët e tjerë”, u shpreh ai.

Franca tani do të udhëtojë drejt bazës së saj stërvitore pranë Bostonit, ku do të përgatitet për Kupën e Botës.

Në Grupin I, francezët do të përballen me Senegalin, Irakun dhe Norvegjinë, me Mbappen dhe Olisen që pritet të jenë figurat kryesore në misionin për ta çuar Francën drejt suksesit në Amerikën e Veriut./Arbresh.info